Samolardan baland - Biz uyga qaytguncha onamizni asra allohim

Uyim deb uyimdan olislardaman
Ro‘zg‘orim kamlari bitmaydi sira
Yaratganim sendan yolg‘iz o‘tinchim
Men uyga qaytguncha Onamni asra

Bolam deb sog‘inib tinmas ko‘zyoshi
Ko‘zlarin yoshlatma yetmas bardoshi
Bir kun qo‘li og‘rir, bir kuni boshi
Men uyga qaytguncha Onamni asra

Qalbiga nur yog‘dir sog‘inmay tursin
Darmonda qoldirma salomat yursin
O‘g‘lim deb kerilsin, baxtimni ko‘rsin
Men uyga qaytguncha Onamni asra

Omadim kelmoqda, biroz daromad
Yurtimga qaytayin, dunyo omonat
Sochlari oqardi ko‘rmay halovat
Men uyga qaytguncha Onamni asra

Yonida yo‘qdirman o‘ksib qolgandir
Hech kim yo‘q xonada yig‘lab olgandir
Ostonada kutib joni tolgandir
Men uyga qaytguncha Onamni asra

Onamdan azizroq kimim bor Olloh
Hatto suyganim ham bo‘lmasa hamroh
Boshimni qay toshga uray men gumroh
Men uyga qaytguncha Onamni asra